VIGAN CITY – Cal .45 ti naaramat iti pannakapapatay ti maysa a balasang iti balay ti live-in partnerna iti Barangay Salindeg ditoy siudad idi rabii ti Enero 30.
Nagudas a dagus ni Maricar Camacho y Fieldad, 29, residente iti Barangay San Julian Sur, Vigan City, ngem agnaed iti balay ti kalib-inna a ni Joh-Jon Dayao y Nolasco, 34, naasawaan.
Naammuan iti inisial nga inbestigasion dagiti polis nga idi agarup alas 10:00 ti rabii ti Enero 30, nakangeg ni Jenny Inyiga y Dayao, 22, kadagiti sumagmamano a kanalbuong ngem dina intaltalek.
Mapapati a nadatngan laengen ni Jon-Jon Dayao ti biktima a nadigos iti dara idi sumangpet iti agarup 1:30 ti parbangon.
Nagsagrap ti bikima kadagiti sugat iti nadumaduma a paset ti bagina a nagtaud iti cal. 45 kas maibatay iti 6 a kapsula ken dua a buli iti nakapasamakan ti krimen.
Iti pannakaisurat daytoy, di pay ammo ti motibo ti pammapatay.#