Babai, nasukalan a nagisakibot iti tagilako

CANDON CITY – Gapu iti kinarigat ti panagbiag ti nangiduron iti maysa a babai nga agilibas iti groseria iti maysa a pagtagilakuan ditoy siudad.

Natiliwan ni Merly Seguban, 39, naasawaan, residente iti Villarica, ditoy siudad a nagisakibot kadagiti tagilako iti maysa a grocery store iti Barangay San Isidro ditoy met laeng siudad.

Naammuan iti inbestigasion ti polis a simrek ni Seguban iti S4 Grocery, kaduana ti maysa nga anakna a babai ket nagingagatang iti groseria ngem mapapati a nagisakibot iti 3 a ham and cheese, 3 a Fresca Tuna ken maysa a supot ti asukar.

Pinanggep ni Seguban ti aglibas idi sitaren ti guardia ngem tinukmaan daytoy.#