Babai, natiliw iti akto nga agsipdut

NARVACAN, Ilocos Sur.  Saan laeng a maysa no di  tallo a kaso ti posible a sanguen ti maysa a babai a natiliwan nga agsipsipdut iti public market ditoy itay nabiit.

Segun iti report manipud iti polis ditoy, nagbalin a biktima ni Erna Marania, 39, residente iti Pug-os, Sinait, Ilocos Sur da Aileen Zapatero, 27, residente iti San Pablo, Narvacan; Eugene Carlo Cadano, ken ni Kathleen Mae Ponce, 21.

Naammuan iti inbestigasion ti polis a madama a gumatgatang ni Zapatero iti kasapulanda iti balayda iti maysa a tienda idi dinalapus ni Marania.

Naduktalan laengen ni Zapatero a napukawna ti wallet nga adda iti shoulder bagna.

Madama met a magmagna ni Cadano idi mapapati a siniggawat ni Marania ti kuentas daytoy. 

Ngem nasiputan ni Grace Cadano, ina ti biktima, ti inaramid ti suspek ket tinengngelna sa nagpaarayat  kada Edwin Callejo ken Manuel Zamora, agpada a barangay tanod.

Naipan ti suspek ti estasion ti polis ket kabayatan ti pannakapalutpotna, nagparang ni Ponce, ket intudona ni Marania a suspetsana a nangsipdut iti 2600 Nokia a selponna.

Taga-Pug-os, Sinait, Ilocos Sur dagiti masansan a matiltiliw a   mannipdut.

Kabayatanna, maysa a sangsangaili ti napukawan ti selpon a mapapati a nasipdut bayat ti kaaddana iti maysa a pagtagilakuan iti Vigan City.

Nagreklamo iti polis ni Aurelia Ragine, 65, agnaed iti San Jose del Monte, Bulacan ngem bimmisita kadagiti kabagianna iti Cabittaogan, Sta. Catalina, Ilocos Sur, a napukaw ti Motorola X-3 a naikabil iti cellphone bag ngem naikaratay iti tengngedna bayat ti kaaddana iti Hataw Marketing iti Quezon Avenue, Vigan City.

Segun iti biktima, nadlawna a linipitlipit ti dua a babbai bayat ti kaaddana iti nasao a pagtagilakuan.

Ngem saan a nagsuspetsa ti biktima agsipud iti kaadu ti tattao iti nasao a pagtagilakuan.

Naduktalan laengen ti biktima nga awanen ti selponna ket nagpulong iti polis.

Nupay kasta, saan a nabigbig ti biktima dagiti suspetsaenna a nangsipdut iti selponna kadagiti retrato nga impakita ti polis kenkuana.#