Footer

Babai, natiliw nga agipuslit iti tagilako

MAGSINGAL, Ilocos Sur –

Saan a pagbiagan no di pakairareman ti sikap. Daytoy ti leksion ti maysa a babai a mangipuslit koma iti kinurimesna a tagilako ngem nabuking ta nagsuspetsa ti tindero.

Kas maibatay iti report, idi sardam ti Hunio 30, simrek iti CJS General Merchandize a masarakan iti public market, Barangay San Lucas ni Rosalinda Baro y Bodano, 55, residente iti Camp Juan Villamor, Calaba, Bangued, Abra, ket gimmatang iti jeans sakbay a rimmuar iti pagtagilakuan.

Ngem nagsuspetsa ti tindero idi nakitana a nabussog ti shoulder bag ti suspek ket impulongna iti manedier.

Kinamat ti akinkukua ti pagtagilakuan ni Baro agingga iti naipiskotda.

Idi linuktanda ti bag ti suspek, nagkarga daytoy iti dua a tribal pants nga agpateg iti P1,000.00 ken Pensuper pants nga agbalor iti P500.00.#