CANDON CITY – Maysa a babai ti natiliwan itay nabiit a nagisakibot iti tagilako iti maysa a supermart ditoy.
Nainaganan ti babai a ni Gina Comachi, 27, residente iti Km. 4, La Trinidad Benguet.
Segun iti inbestigasion ti polis, nagpammarang ni Comachi a masikog ngem gatas gayam dagiti insakibotna ken ginandatna nga ilibas nga iruar iti CSI Supermart ditoy siudad.
Segun kada Hector Sabaot ken Joseph Cabico, agpada a security guard ti CSI-Candon, natukay ti panagsuspetsada idi makitada ti biktima a magmagna nga agpakkapakkang.
Idi konprontaenda ti suspetsa, natakuatan dagiti guardia a tallo a lata ti Ensure milk nga agpateg iti P4,470 ti naisukibot iti girdle ti suspetsa.#