Babai, natiliwan nga agilibas iti tagilako

CANDON CITY – Pagbaludan ti nagtungpalan ti maysa a babai idi ginandatna nga ilibas dagiti sumagmamano a tagilako iti maysa a pagtagilakuan a dina binayadan.

Impan ti security guard ni Lorna Trinidad, 27, residente iti Sabangan, Santiago, Ilocos Sur iti police station kalpasan a natiliwan nga agilibas  kadagiti insupotna a sumagmamano a tagilako iti Jezzi’s Enterprise.

Naammuan iti inbestigasion a nasiputan ti saleslady ti suspetsa a  nagisupot  kadagiti tagilako ngem saan  a nagbayad iti cashier ket impulongna iti  guardia a nangkamat iti daytoy idi rummuaren iti pagtagilakuan.

Naala iti ikut ti suspetsa ti dua a sabon a paglaba, 1 Johnson powder, 1 colgate, 1 sunsilk shampoo, 1 a kapas, 6 a panties, ken 4 a shorts nga aggatad amin iti P938.#