Babai a negosiante, napaltogan; DOA iti ospital

STA. MARIA, Ilocos Sur – Maysa a negosiante ti napaltogan iti asideg ti sports complex iti Barangay Poblacion Norte ditoy nga ili idi agsapa ti Disiembre 7.

Saanen a naidanon ti biag ni Myrna Badilla y Asilo, 60, awanan asawa, negosiante ken residente iti nadakamat a barangay, iti Judge Celestino Guererro Memorial Hospital gapu iti grabe a sugat a sinagrapna gapu iti pannakapaltogna.

Segun iti report, mapan gumatang ni Badilla ni pandesal iti panaderia, ket bayat ti pannagnana iti bisinidad ti sports complex ti nadakamat a barangay, pinaltogan ti suspek a nagaruat iti nalabaga a diaket ken nangisit a kallugong iti namindua a beses.

Kalpasan ti pammaltog, naglugan ti di nabigbig a suspek iti di nailasin a motorsiklo nga agur-uray iti dayaen a paset ti sports complex sada naglibas iti kaduana a nagserbi a drayber iti saan nga ammo a direksion.

Nangiwayat dagiti nagresponde a polis iti hot pursuit operation sada nangipatulod iti alarma kadagiti kabangibangda a police stations ngem saandan a nasapulan dagiti suspek.

Iti crime scene processing nga inwayat ti Kimat ken Soco team manipud iti crime laboratory, Candon City, nakarekobreda iti dua a kapsula a nagtaud iti cal. 45.

Saan pay nga ammo ti motibo ti pammaltog.

Kabayatanna, dati a susik ti maitudtudo a ramut ti panangpaltog ti maysa a drug surrenderer iti kalugaranna sadiay Barangay Purok a Bassit ditoy nga ili idi malem ti Disiembre 7.

Pinaltogan ni Rhannie Riveta Paa, 42, naasawaan, awanan panggedan, drug surrenderer, ni Jonathan Riveta Jimenez, 49, naasawaan, gapu iti mapapati a susikda iti napalabas.

Kas maibatay iti report, bayat ti pannakipatpatang ni Jimenez kada Barangay Chairman Reynaldo Natividad ken Barangay Kagawad Benjamin Castaneda y Aslor, kellaat nga immasideg ni Paa a nakasakay iti motorsiklo ket pinaltoganna ti biktima iti sumagmamano a beses a nakatiruan ti nadumaduma a paset ti bagi daytoy.

Naglibas a dagus ti suspek kalpasan ti pammaltog idinto nga intaray dagiti nagresponde a polis ti biktima iti Gabriela Silang General Hospital, Tamag, Vigan City.

Nangipatulod ti polis-Vigan iti flash alarm kadagiti kabangibangna a police stations para iti pannakatiliw ti suspek ngem negatibo ti resultana.

Nakarekobre dagiti inbestigador iti dua a kapsula manipud iti cal. 45 iti nakapasamakan ti krimen.

Saan a nailanad iti blotter no ania ti nagsusikan ti suspek ken ti biktima a puon ti nangpaltogan ti immuna iti maikadua. (Tawid News)