Babbai a kadete, maparitan nga agassawa, 3 tawen agserbida iti militar

BAGUIO CITY – Maparitan dagiti babbai a kadete a nagturpos ditoy a pagadalan a makiasawa no saanda a makapagserbi iti tallo a tawen iti militar.

Idi naammuan daytoy ni Senador Pia Cayetano bayat ti panangirusatna iti Philippine Military Academy ti 3rd Kababaihan Festival idi Marso 6 kas paset ti panangrambak iti International Women’s Day ditoy siudad, kinunana a rumbeng a saklawen daytoy a polisia ti PMA saan laeng a dagiti babbai no di pay mairaman dagiti lallaki.

Innayon ti senadora a masapul ti pannakarebio ti nasao a polisia tapno maammuan no ania ti impact daytoy a restriksion kadagiti babbai a kadete.

Nadakamat ni Army 2nd Lieut. Tara Velasco-Caydon bayat ti pannakipatpatang kenkuana ni Cayetano a naammuanna ti nasao a polisia idi agsubli a mapan mangisuro iti akademia.

Ni Caydon ti kangatuan ti pammadayaw iti Madarangan (Mandirigmang May Karangalan) Class 2003. Isu ti maikadua a babai a nagturpos a kangatuan iti klaseda.

Mapapati a nagbalin a diskusion dagiti opisial ti akademia daytoy a restriksion tapno makapatanorda kadagiti babbai para iti combat duty.

Maipagarup a nagbalin a case study ti maysa a babai a nagturpos iti akademia a pinilina ti Corps of Profession imbes a combat duty tapno ad-adu ti oras a maipaayna para iti pamiliana.

Kinuna ni Cayetano a saan a patas ti nasao a restriksion para kadagiti babbai.#