Babbai a polis ti Region 1, nakipartisipar iti Women’s Month Celebration

SAN FERNANDO CITY – Nakipartisipar dagiti babbai a polis manipud kadagiti nadumaduma a unit iti Region I iti kick-off ceremony ti Women’s Month a naangay idi Marso 8.

Kinuna ni Police Chief Superintendent Franklin Jesus B. Bucayu, PRO1 Regional Director, a nakipartisipar iti selebrasion dagiti babbai a polis kas panangiparangarang iti panagmaymaysa ti PRO1 iti pannakaipromot ti gender equality ken respeto para babbai saan laeng nga iti las-ud ti organisasion ti kapolisan no di pay iti pakabuklan ti komunidad.

Nangrugi ti selebrasion babaen ti maysa a funwalk a naaramid iti 6:00 ti bigat a nakipartisiparan dagiti babbai a personnel dagiti nadumaduma nga ahensia ti gobierno ken NGOs a sinaruno ti maysa a misa ken lektiur iti Climate Change babaen ti DENR-RO1.

Tinawen a maselebraran ti Women’s Month babaen ti Proclamation No. 224 kas panangbigbig iti napateg nga annongen dagiti babbai iti ekonomia, kultura, politikal, sosial ken dadduma pay a lugar iti biag ti nasion.

Ti tema ita a tawen: “Women Weathering Climate Change: Governance and Accountability, Everyone’s Responsibility.”#