Back rider a nainbolbar iti aksidente, pimmusay iti ospital

SAN ILDEFONSO, Ilocos Sur – Pimmusay iti nakaitarayanna nga ospital ti back rider ti motorsiklo a nainbolbar iti aksidente sadiay Barangay Gongogong, ditoy nga ili idi rabii ti Mayo 24.

Agarup pito oras kalpasan ti aksidente, pimmusay ni Roy Tabbilos, residente iti Barangay Padu Chico, Sto. Domingo, Ilocos Sur iti Metro Vigan Cooperative Hospital a nakaitarayanda ken ni Jomarie Torena y Songhuan, 20, baro, ken residente iti Barangay Cabigbigaan, Sto. Domingo.

Mapapati a napukaw ni Torena ti kontrolna iti manibela ti minanehona a motorsiklo iti pagkurbaan ti rangtay iti nasao a lugar ket dinungparna ti steel barrier ken signboard ti rangtay sada naitapuak iti waig.

Nagsagrap dagiti dua kadagiti sugat iti nadumaduma a paset ti bagida ket awanen ti puot ni Tabbilos idi maitarayda iti ospital.#