Backrider, nagudas iti panagdinnungpar motorsiklo ken van

SANTIAGO, Ilocos Sur – Natay ti backrider idinto a nadunor ti nagmaneho iti motorsiklo idi dinungpar ti maysa a van ti luganda iti national highway a sakup ti Barangay Bigbiga ditoy nga ili idi nariwet nga agsapa ti Septiembre 8.

Naideklara nga awanen ti biag ni Rev. Margarita M. Balmacio idi maidanonda ken ni Rev. Renato B. Balmacio, pastor ti Assembly of God,  iti Candon General Hospital.

Naipa-medical exam met ni Jomar Manzano y Aglibut, 28, naasawaan, ken residente iti Barangay Linctic, Banayoyo iti nadakamat nga ospital sa naipan iti police station para iti dokumentasion ken disposision.

Limtuad iti panagimbestiga dagiti polis nga agpaabagatan a direksion ti Honda Wave a minaneho ni Balmacio ket iti nakapasamakan ti aksidente, mapapati nga inobertekanna ti maysa a di nabigbig a behikulo ngem idi agsublin iti liniana, dinungpar ti Isuzu Elf van a minaneho ni Manzano a puon ti nagsagrapan dagiti biktima iti dunor iti ulo ken bagida.#