Badigard ti politiko, napapatay iti sanguanan ti videoke bar

VIGAN CITY – Maysa a mapapati a badigard ti maysa a politiko ti tinatek iti bala dagiti armado a tattao idi pasado alas dose ti rabii ti Mayo 2 iti maysa a videoke bar iti asideg ti tiendaan publiko ditoy siudad.

Indeklara ni Dr. Evelyn del Castillo, medical officer ti Vigan City, a natayen idi maidanon iti Lahoz Clinic ni Pablito Reduque y Benaza, 61, balo, ken residente iti Barangay Capangpangan, ditoy siudad gapu iti kaadu ti sugatna iti nadumaduma a paset ti bagina.

Kinuna ni  Police Inspector Ernesto Navarro, Jr., OIC, nga on-going ti panagimbestigada ket rebisarenda ti footage ti CCTV camera a manamnama a nangirekord iti napasamak a pammaltog tapno makitada no ania a klase dagiti lugan dagiti nangisayangkat iti krimen ken ti numero ti plaka dagitoy.

Kinuna ni Navarro nga alegasion dagiti saksi  nga adda nagpipinnaltog isu a naglemmengda iti butengda ket dida nakita dagiti simmaruno a napasamak.

Innayon ti OIC ti Vigan City Police Station a maysa a saksi ti nagkuna nga adda maysa a dimsaag iti maysa a kotse sa nagpaputok.

Mapapati a maysa a Toyota Corolla ken Honda Civic a maris nalabaga nga addaan iti WGH iti numero ti plakana ti nagluganan dagiti suspek a nagpakaskas a nagpaamianan kalpasan ti pammaltog.

Segun iti inisial nga inbestigasion dagiti nagresponde a polis ditoy, kadisdissaag manipud iti naglugananda a traysikel da Reduque ken ni Molina iti sanguanan ti Highlander Videoke Bar a masarakan iti Jose Singson Street, Brgy VIII Vigan City, Ilocos Sur idi dua nga armado a lallaki ti nangpalpaltog kadakuada iti nagsasaruno a nakaigapuan ti dagus a pannakapasag ni Raquepo.

Napuntaan iti stray bullet ti makannigid a saka ni Molina ngem nakataray a nagpadaya.

Mapapati a sinurot dagiti suspek ti nagluganan dagiti biktima a traysikel sakbay nga insayangkatda ti pammaltog.

Naipan ti biktima, mapapati a badigard ni Santa Vice Mayor Jesus “Popoy” Bueno iti Holy Angel Funeral Homes, Vigan City para iti pannakaautopsiana.

Naitaray met ni Ricardo Molina y Artates, 54, balo, kadua ni Raquepo iti dayta a rabii ken kalugaranna, iti nadakamat nga ospital para iti pannakaagasna.

Nakarekobre dagiti SOCO a nakabase iti Ilocos Sur PPO iti 23 a kapsula manipud iti cal. 40, 8 a kapsula manipud iti 9 mm, 2 a naiputok a bala, 2 a deformed slugs, 4 a metallic jackets, ken 1 live ammo para iti cal. 40 iti nakapasamakan ti krimen.

Adda pay iti ikut dagiti polis ti paltog a mapapati nga iggem ni Reduque iti nakapasaganna. Mapapati a naasut ni Reduque ti paltogna ngem saan a nakapagpaputok.

Kinuna ni Navarro a kitkitaenda ti anggulo a personal grudge ti motibo ti pammapatay kas maibatay iti kaadu dagiti bala nga impakapet dagiti di pay nabigbig a suspek iti biktima.#