Bag a nagkarga iti paltog, nasarakan iti waiting shed

BANAYOYO, Ilocos Sur – Patien ti kapolisan ditoy nga adda dakes a panggep dagiti tallo a lalaki nga aggiinom iti waiting shed sadiay Barangay Banbannaal, ditoy nga ili idi rabii ti Hulio 27 ta adda nabati dagitoy a bag a nagkarga iti paltog ken balisong.

Bayat ti panagpatrolia dagiti polis, tallo a lalaki ti kellaat a nagtataray nga immadayo ket idi nagsukimatda iti awan silawna a waiting shed a naggapuanda, naduktalanda nga aggiinom dagitoy.

Nasukalanda pay nga adda nabati dagiti lalaki a bag a naglaon iti .38 caliber revolver a nagmarka iti Smith ken nagkarga iti tallo a bala iti cylinder ken maysa a folded Batangas knife.

Impan dagiti polis ti paltog ken balisong para iti dokumentasion ken umisu a disposision.#