Footer

Bag ti negosiante, nasikuat bayat pannaturogna

VIGAN CITY – Ti makaturog, makamukat, kuna ti maysa a pagsasao.

Nargaan unay ti turog iti uneg ti tiendana ni Thelma Bravo y Biernes, 39, naasawaan, negosiante, ken residente iti Barangay IV ditoy siudad ket idi makariing, awanen ti bagna a naglaon iti kuarta, selpon ken dadduma pay nga alikamenna.

Idi agarup 10:05 ti rabii ti Hulio 12, nagreport ni Bravo iti polis a natakaw ti shoulder bagna a naglaon iti P10,000.00, credit cards, ATM card, SSS ID, Voter’s Id, Nokia C3 cellphone ken lisensiana nga agmaneho iti mismo nga uneg ti Bonzaikla’s Pizza a pagtagilakuanna.

Kinuna ni Bravo a nalipatanna nga in-lock ti ridaw ti pagtagilakuanna idi maturog ket nariinganna laengen nga awanen ti bagna nga inkabilna iti sirok ti cashier’s table.

Nakasarak dagiti inbestigador iti rungrong ti sigarilio iti uneg ti tienda a mapapati a tedda ti mannanakaw.

Awan ti CCTV camera a nayinstolar iti nasao a pagtagilakuan ken uray dagiti kabangibangna a tienda.#