Bagahe ti OFW a naipatulod babaen freight service, nabukitkitan

STA. LUCIA, Ilocos Sur – Nagreport iti polis ti maysa nga overseas Filipino worker gapu ta nabukitkitan ti bagahena a naipatulod babaen ti freight service ket mapukpukaw dagiti sumagmamano nga alikamenna.

Personal a nagturong ni Leonora Angala y Palacol, 49, naasawaan, OFW, ken residente iti San Juan, Sta. Lucia, Ilocos Sur, iti police station sana inreklamo ni Paul Anthony Elegado y Gallos, 35, naasawaan, empleado ti T-des Transport ken residente iti No. 4 Maple Street Northwood Villa, Pasig gapu ta adda dagiti napukaw a napapateg nga alahas ken personal belongings a naikabil iti nabukitkitan a bagahe.

Kinuna ni Angela a sinukimatna iti sanguanan ni Elegado ti bagahena ket naduktalanna a nadadael ken naluktan daytoy.

Kinuna ni Angela a mapukpukaw dagiti assorted nga alahasna a pakaibilangan ti aritos, bracelet, kuentas ken dadduma pay a napapateg a personal belongings nga agbalor iti sumurok kumurang P20,000.00.

Iti panagsaludsod dagiti polis, naammuan a simmangpet ni Angela iti Clark International Airport, Pampanga via Qatar Airways idi Oktubre 26 ngem imbatina ti bagahena iti airport agsipud ta naladaw a simmangpet.
Kinuna ni Angela nga inkari dagiti agpapaay iti nasao nga airline a maideliber ti bagahena babaen iti freight services.#