Bagas ken Itta

Ni Tatang Lakay

 

Kadagiti demokratiko a pagilian iti ballasiw-taaw, kas iti US, napateg ti partido iti maysa a politiko, kas kapateg ti naganna. No maysa a Demokrata, demokrata agingga iti tungpal biagna. Uray no naiwallages ti partidona iti eleksion, dimo namnamaen a talawanna ti partidona.Agtalinaed iti partido ta kas kapateg ti dayawna ti partidona.

Ditoy Pilipinas, idi tiempo da Manuel L. Quezon ken Manuel Roxas, dua laeng ti kangrunaan a partido. Ngem idi tiempo daydi nag-Presidente Ferdinand E. Marcos, naipasdek ti Kilusang Bagong Lipunan a nagbalin nga umbrella party dagiti amin a partido. Ditoy ti namunganayan ken panagtubo a kasla uong dagiti partido a kimmappon iti KBL.

Idi panawen ni nag-Presidente Cory Aquino, Fidel Ramos ken napadisi a Pres. Joseph Estrada ken ti agdama nga administrasion (Pres. Gloria Macapagal-Arroyo), nagtalinaed dagiti partido ket kimmapponda iti dominante a partido tapno agbalin a koalision.

Naggangayanna, awanen ti two-party system ket simngay ti coalition party. Dakkel a pagsayaatan iti administrasion ti koalision agsipud ta maipastrekna dagiti prioridadna a programa iti Kongreso ken Senado.

Iti sabali a bangir, kasapulan ti pammagusto ken kumpromiso tapno laeng mapagtalinaed ti koalision.

Iti daytoy nga eleksion ti pakalukaisan ti dakes a resulta ti multi-party system a kaadduanna ti sumabsabit laeng iti dominante a partido agsipud ta saanda a makatakder a bukodda.

Kas iti administrasion ni Pres. Gloria Macapagal-Arroyo, bitbitbiten ti koalision dagiti agduduma a partido a kas iti Lakas-Christian Muslim Democrats, Liberal Party, Nationalist People’s Coalition, ken dadduma pay a partido.

Ngarud iti daytoy nga eleksion, awanen ti makuna a parti-partido no ibase iti listaan dagiti kandidato para iti masungad nga eleksion nangruna iti kinasenador.

Kas pagarigan, ania ti kaadda da John Osmeña, Miriam Defensor Santiago, Robert Jaworski, dati a Defense Secretary ni Estrada Orlino Mercado iti partido ni Pres. Macapagal-Arroyo?

Maipalagip a dagitoy ti napinget a nangsuporta ken ni dati a Pres. Joseph Estrada bayat ti impeachment trial.

Kasta met iti Koalision ng Nagkakaisasng Pilipino, kasano nga adda da nag-Senador Ernesto Herrera a para senador ken ni Sen. Loren Legarda a para bise presidente?

Maipalagip a nagpirma ni Herrera iti impeachment ni Estrada iti Kamara idinto a malaglagip ni Legarda a crying lady idi naabak dagiti senador a pabor iti pannakalukat ti maikadua nga enbelop a naglaon kadagiti mapapati a dokumento ti bangko ni Estrada iti nagan ni Jose Velarde.

No amirisen, pulos a saan nga agtipon dagitoy a politiko iti maymaysa a partido.

Ngem kasta ti politika ditoy pagilian.Awanen ti makuna a partido. No adda saan a mapagustuan a politiko, kasla kulibangbang nga agbatay iti sabali a partido. Kasla kawes ti partido a no narugiten, suktan ni politiko.

Husto ti kuna ti maysa a maraem a kolumnista: kasla nabatir nga itlog ti listaan dagiti senador a papili iti masungad nga eleksion.

Iti sabali a pannao, saanen a mailasin ti bagas iti itta.#