Latest News: Baguio City, addan maysa a positibo a kaso iti COVID-19 | Tawid News Magazine - Weekly Ilocos News 📰

Baguio City, addan maysa a positibo a kaso iti COVID-19

BAGUIO CITY — Addan maysa a positibo a kaso iti COVID-19 ditoy Baguio City. Daytoy ti inwaragawag ti Department of Health tattay bigat ti Marso 23.

Segun kenni Dr. Amelita Pangilinan, regional director ti DOH Cordillera, ti nagpositibo a pasiente ket maysa a babai, 61-anios, overseas Filipino worker (OFW) sadiay Italia, a simmangpet ditoy pagilian idi Marso 2.

Nakarikna ti nasao a babai iti sintomas kas iti uyek, sore throat ken panateng, idi Marso 7.

Inrugin dagiti otoridad ti contact tracing, pakairamanan ti pamilia ken dagiti kakabagian ti pasiente.

Kuna pay ni Pangilinan a maysa kadagiti nabigbig a close contact ti pasiente ket asymptomatic pay laeng.

Daytoy babai nga OFW ti maikadua a kaso iti COVID-19 iti intero a rehion ti Cordillera. Ti immuna a kaso ket maysa a lalaki a seaman a residente iti Abra.

Nupay kasta, addan ti pasiente iti natalged a kondision ken madama a naka-admit iti maysa a Level 3 nga ospital ditoy siudad ti Baguio.