Baka, inuraga dagiti nagtakaw

MAGSINGAL, Ilocos Sur – Ti laengen sumagmamano a paset ti naguneg ti baka a naireport a napukaw ti nasarakan dagiti polis iti nagbeddengan ti dua a sitio ditoy nga ili idi agsapa ti Septiembre 19.

Mapapati a rinangrangkay dagiti mangngagab ti maysa ti tawenna a baka sada nagbibingayan.

Sakbayna, inreport ni Herlinda Villamar y Atanacio, 56, naasawaan, ken residente iti Barangay Patong, Magsingal, a mapukpukaw ti bakana nga agbalor iti nasurok P15,000.00.

Segun ken ni Villamar, nakagalut ti bakana iti likudan ti balayda idi agarup 7:00 ti sardam ti Septiembre 18 ngem iti kabigatanna, awanen daytoy.

Nasarakan dagiti nagresponde a polis ti sumagmamano a paset ti naguneg ken nagbalay a dara ti baka iti boundary ti Sitio Darao ti Barangay Bungro ken Sitio Ubbog iti Barangay Patong, Magsingal.

Di pay ammo no asino ti nangtakaw iti baka ni Villamar.#