Baka natakaw iti nakaiwaywayanna

MAGSINGAL, Ilocos Sur – No saan a dagus a nagtignay dagiti polis ditoy, naipuslit koma a mailako iti sabali a probinsia ti maysa a baka a natakaw idi malem ti Marso 7.

Idi agsapa ti Marso 8, inreport ni Rafael Tubon y Ubarde, residente iti Barangay Gacutan ditoy nga ili a napukaw ti baka a babai a kukua ni Pedro Rosario, 25, residente met laeng iti nadakamat a barangay, a naiwayway idi malem ti Marso 7 iti kataltalonan.

Nagturong dagiti polis iti Barangay Bungro ditoy met laeng nga ili ket nadatnganda ti baka a maibiahe koman tapno mailako iti sabali a lugar.

Idi palutpoten dagiti polis da Alfredo Visoria, 67, residente iti Barangay Bacsil, San Juan, Ilocos Sur ken ni Rodolfo Jaramillo, residente iti Barangay Quinarayan, San Ildefonso, Ilocos Sur, inakoda a nailako ti baka kadakuada ket innagananda ti naglako a ni Juanito Uganisa y Javier, 31, baro, residente iti Barangay Gacutan, Magsingal.

Nangisayangkat dagiti polis iti follow-up operation a nagtungpal iti pannakaaresto ti suspek.

Iti pannakaisurat daytoy, madama pay ti panagimbestiga dagiti polis mainaig iti nasao a panagagab iti baka.#