VIGAN CITY – Immadu dagiti sangaili ken turista a nagbakasion ditoy siudad kalpasan nga indeklara ti nasional a gobierno a bakasion sadiay Metro Manila gapu iti pannakaangay ti APEC Summit manipud Nobiembre 16-20, 2015.
Naammuan ti Tawid News a fully booked dagiti otel ditoy siudad gapu iti kaadu dagiti nagsangpet a turista a nanggundaway iti kaawan ti klase ken opisina iti Metro Manila maigapu iti APEC Summit.
Kinuna ni Mayor Eva Marie S. Medina a sipud naideklara ti Vigan a maysa kadagiti New7Wonders Cities of the World, dimmakkel nga am-amang ti bilang dagiti turista nga agpasiar ditoy siudad.
Innayonna a dakkel ti maitulong ti kaadu dagiti turista nga agpallailang iti Vigan City iti panagdur-as dagiti babassit a negosio ken kasta met a mabenepisiaran dagiti adda iti sektor ti transportasion. (Karaman ti report ni Edison Raboy)