Baket, biniktima ti Budol-budol Gang

VIGAN CITY – Nangbiktima manen ti Budol-Budol Gang ditoy siudad idi Hulio 19 a nakapukawan ti maysa a baket kadagiti alahasna.

Nagpulong iti polis ni Luciana Agoy, 77, residente iti St. Mary’s Village, Pantay Daya, Vigan City, a biniktima ti dua a babbai ket intarayda ti singsing ken aritosna.

Kas insalaysay ni Agoy, kabayatan a magmagna iti Del Pilar Street Extension iti agarup alas nuebe ti bigat ti Hulio 19, dua a babbai ti immasideg kenkuana sada nagpammarang a kabagianna.

Naallukoy ti baket a limmugan iti pink a van dagiti suspek ket bayat ti panagdaliasat ti lugan, impasiripda iti biktima ti maysa a bag a naglaon kadagiti doliar.

Segun iti baket, nakumbinsir dagiti babbai nga itedna kadakuada ti singsing ken aritosna, kasukat dagiti doliar a linaon ti nakandaduan a bag.

Imbaba dagiti suspek ti biktima iti igid ti national highway a sakup ti Barangay Paing, Bantay.

Apaman a nakaawid ti baket iti Barangay Pantay Daya, pinaluktanna ti bag ket anian a pannakadismayana ta naglaon daytoy kadagiti nakartib a pappapel ken 1/4 kilo a brown sugar.

Impakaammo ti biktima ti napasamak iti polis ti Vigan ket nagsawar dagitoy ken nagpakdaar kadagiti kabangibangda a police stations ngem saandan a nabirokan dagiti suspek.

Saan a nadakamat iti report no mano ti balor ti singsing ken aritos ti baket.#