SANTIAGO, Ilocos Sur – Naglak-am iti sugat iti ulo ken bagi ti maysa a baket kalpasan a dinungpar ti maysa a dyip iti national highway a sakup ti Barangay Caburao ditoy nga ili.
Nabigbig ti biktima a ni Mercedez Villena, 85, balo, residente iti nasao a barangay idinto a nainaganan ti dimmungpar kenkuana a ni Rodelito Tuanquin, 39, ken residente iti Palitpit, Lagangilang, Abra.
Segun iti report, agdaldaliasat ti dyip iti Barangay Caburao idi bimmallasiw ti biktima iti kalsada ket nupay pinadas a liklikan ti drayber, nadungparna latta.
Gapu iti pigsa ti pannakadungparna, naipuruak ti baket iti kalsada. Naitaray daytoy iti Candon General Hospital para iti pannakaagas dagiti sugatna. (Danny Antalan)