Baket, dinungpar ti motorsiklo

SANTA, Ilocos Sur – Maysa a baket ti dinungpar ti maysa a motorista a puon ti nakaiyospitalanda a dua.

Naitaray iti Metro Vigan Cooperative Hospital ni Ofelia Verbo y Layugan, 60, naasawaan, residente iti Barangay Mabilbila ditoy nga ili idinto a nataming ti sugat ni Bonifacio Alviar y Bringas, 56, drayber ti rural health unit ti Santa, residente iti Barangay Labut Norte ditoy met la nga ili.

Segun iti report, linabsan ni Alviar a nakalugan iti Euro single motorcycle ti maysa a traysikel ngem mapapati a kellaat met a bimmallasiw ni Verbo a puon ti nakadungparan kenkuana ti motorsiklo.

Nagsagrap ti biktima iti dunor iti nadumaduma a paset ti bagina. Nadadael met ti motorsiklo ni Alviar.#