Baket dinungpar ti truck, natay

SANTIAGO, Ilocos Sur –  Natay ti maysa a baket gapu iti panangdungpar kenkuana ti maysa a truck sadiay Barangay Bulbulala, ditoy nga ili idi malem ti Mayo 14.

Dead on the spot ni Remedios Escritor y Carranza, 67, residente iti nadakamat a barangay idi dinungpar ti Isuzu Forward truck a minaneho ni Antonio Galvez, 50, ken residente iti Barangay San Agustin, San Fernando City, La Union.

Iti inisial nga inbestigasion, idi agarup alas tres ti malem iti nadakamat a petsa, agdaldaliasat ti Isuzu Forward truck iti agpaabagatan a direksion iti kalsada nasional a sakup ti Barangay Bulbulala  idi mapapati a kellaat a bimmallasiw iti kalsada ni Escritor ket saan a naguantaran ni Galvez gapuna a nadungparna ti baket a nagsagrap kadagiti grabe a sugat a nakatayanna a sigida.

Iti pannakaisurat daytoy, madama ti panagareglo ti pamilia ti biktima ken ti kompania ti truck tapno saanen a dumanon pay iti korte ti napasamak.#