Baket, nadukotan

CANDON CITY – Iti ima ti mannipdut ti nagtungpalan ti inruar ti maysa a baket a kuartana iti bangko idi Marso 21.

Nagpulong iti polis ni Mercedes Licudine, 72, agnaed iti Barangay Becques, Tagudin, Ilocos Sur a nadukot ti P130,000.00 nga inruarna iti Philippine National Bank ditoy ket suspetsana a ti babai a nangsursurot kadakuada ti nangsipdut iti kuartana.

Segun iti biktima, kalpasan ti panangiruarna iti kuartana iti bangko, bayat ti pannagnada ken ni Remely Licudine, adda nadlawna a babai a nangsursurot kadakuada ken nangguyod iti bagna.

Uray idi simrek dagiti dua iti Novo Store, mapapati a simmurot ti babai iti uneg sa met laeng pimmanaw.

Naduktalan laengen ti baket a naiwa ti bagna ken awanen ti kuartana bayat ti panagmeriendada iti maysa a bakery.#