Baket, nagaburan iti basura

CABUGAO, Ilocos Sur – Nagaburan ti ginabsuon a basura ti maysa a baket nga scavenger a puon ti ipapatayna.

Naideklara nga awanen ti biag ti baket a nabigbig a maysa a Lorenza Cabigat Aquino, 74, natibo iti Barangay Sto. Tomas, Candon City ngem aggigian iti Barangay Quezon, Cabugao idi maidanon iti rural health unit ditoy kalpasan nga aksidente a nagaboran kadagiti binuntuon a basura idi agarup 10:55 ti aldaw ti Pebrero 6.

Agarup 3:30 ti malem iti nadakamat a petsa idi maiyaon ti bunggoy ti Cabugao police station, MDRRMC ken PDRRMC, Ilocos Sur ti baket manipud kadagiti binuntuon a basura.

Mapapati a saan a nakita ni Simeon Aquino y Soller, 49, ti baket nga agpidpidut kadagiti basura a mabalin pay a maprobetsana bayat ti panagiwalinna kadagiti binuntuon a basura babaen ti buldoser.

Iti pannakaisurat daytoy, adda iti kustodia ti police station ti buldozer operator.#