Baket, nasukalan nga agipuslit iti tagilako

VIGAN CITY – Napaneknekan ti kinapudno ti pagsasao nga awan ti agbilang a di agpullo.

Nagballigi ni Norma Sinlao y Pabito, 73, naasawaan, ken residente iti Brgy Ambunao, Calasiao, Pangasinan, a nagipuslit kadagiti tagilako iti Ergo Supermart a masarakan iti Barangay VIII ditoy siudad, ngem iti maikapat a panagtakawna, saanen a nakalusot pay.

Nasukainan iti uppat a Promil Gold 1.6 kg. nga agbalor iti P6,940.00 iti nagbaetan ti sellang ni Norma Sinlao y Pabito, 73, naasawaan ken residente iti Barangay Ambunao, Calasiao, Pangasinan a panggepna koma nga ipuslit iti nasao a pagtagilakuan idi agarup 2:40 ti malem ti Disiembre 29.

Modus operandi ni Sinlao ti agpammarang a gumatang iti tagilako sana ipuslit dagitoy babaen ti panangilemmengna iti nagbaetan ti luppona.

Iti panangsukimat dagiti inbestigador iti CCTV, naduktalanda a namitlo gayamen a nakaipuslit ni Sinlao kadagiti tagilako manipud iti Ergo.#