SALCEDO, Ilocos Sur – Nagreport iti polis ti maysa a baket a natakawan iti alahas iti mismo a pagtaenganna sadiay Barangay Calangcuasan ditoy nga ili idi aldaw ti Hunio 3.

Segun ken ni Anita Cortez y Bello, 82, balo, ken residente iti nadakamat a barangay, sinikuat ti dua a babbai dagiti alahasna nga agpateg iti sumurok kumurang P10,000.00.

Mapapati nga idi Marso daytoy a tawen, napan dagiti dua a babbai iti balay ti biktima ket dinamagda dagiti daan nga alahas daytoy a maitubog.

Pinastrek ti baket dagiti dua sana inruar dagiti alahasna ngem kinuna dagiti suspek a maitabnaw dagiti alahas iti maysa a tabo tapno ditoy a matubog.

Idi rimmuar dagiti suspek, imbagada nga adda pay papananda ket agsublidanto kalpasan ti maysa nga oras.

Nagur-uray ti baket ngem idi awanda met laengen, napanna kinita dagiti alahasna ket naduktalanna nga awanen dagitoy iti tabo.#