Baket, natiliw iti akto a mangitaray iti kuarta

CANDON CITY.  Dandani naitaray ti bag a naglaon iti kuarta ken selpon ti maysa nga aglaklako iti nateng iti tiendaan publiko ditoy  a dina nasiputan nga innala ti baket a nagpammarang a kustomer.

Natiliw babaen kadagiti aglaklako met laeng ni Benilda Arce, 72, residente iti Barangay V, Vigan City kalpasan a linibasna nga itaray ti bag ni Elena Towang y Pacho, 51, vegetable vendor ken residente iti Bagani Ubbog, Candon City.

Kinuna ni Towang a naikabil ti P30,000 ken selpon iti bagna.

Iti inbestigasion ti polis, nagingagatang ti suspetsa nateng sa kalpasanna,  nagtugaw iti abay ni Towang.

Bayat ti panangikarga ni Towang dagiti nateng iti supot, timmakder ti suspek sa nagpakada nga adda gatangenna a sabali.  Nairana met nga adda bayadan ti biktima gapuna a binirokna ti bagna ngem awanen iti nangidissuanna.

Nagpatulong ni Towang kadagiti padana nga aglaklako ket kinamakamda ti suspetsa.

Idi sukimatenda ti shoulder bag ti baket, nakitada a naipisok sadiay ti bag ti biktima.

Naipan ti suspetsa iti kuerpo iti polis tapno maimbestiga.

Kabayatanna, maysa met a negosiante ti natakaw ti bagna a naglaon iti alahas ken dokumento bayat ti panaglakona iti tiendaan publiko iti Vigan City.

Nagpulong iti polis ni Carmencita Palmares, 58, naasawaan, residente iti Sagneb, San Ildefonso, Ilocos Sur ket kinunana a suspetsana a nangala iti bagna ti maysa a babai a nagpammarang a kustomer.

Segun iti baket, imparabawna ti shoulder bagna iti tugaw iti uneg ti puestona ket dina napuotan a napukaw.

Naglaon ti bag kadagiti alahas, pasaportena ken sangaraay a tulbek.

Suspetsa ti negosiante a ti babai a napan naginggagatang iti lakona ti nangsikwat iti bagna.#