Baket, tinarayan ti nangdungpar kenkuana

BANTAY, Ilocos Sur – Saan pay a nabigbig dagiti nagmaneho iti big bike motorcycle a nangdungpar iti maysa a baket iti national highway a sakup ti Barangay Bulag idi bigat ti Enero 10.

Iti pannakaisurat daytoy, adda pay la iti Gabriela Silang General Hospital ti biktima a nabigbig iti nagan a Visitacion Peredo y Catinsa, 65, balo, ken residente iti Barangay Balaleng Purok, Bantay, Ilocos Sur gapu iti natukkol a makannigid a tumengna ken dunorna iti nadumaduma a paset ti bagina.

Iti panagimbestiga dagiti polis, agpadaya a direksion dagiti motorista idi aksidente a nasapgid ti maysa kadakuada ti bikima bayat ti panagballasiw daytoy iti kalsada.

Nakikoordinar ti Bantay police kadagiti kaparangetda a police station para iti pannakatiliw dagiti naglibas a suspek ngem negatibo ti resultana.#