Bakla a nagipasupli iti peke a kuarta, kumplotna, natiliw iti checkpoint

CANDON CITY – Natiliw ti maysa a bakla ken ti kumplotna bayat ti panaglibasda iti checkpoint nga impakat dagiti polis kalpasan a napaayda a nagipasupli iti peke a kuarta iti maysa a pagtagilakuan ditoy siudad idi malem ti Nobiembre 7.

Positibo a binigbig ni Evelyn Carreon y Ragonton, 40, naasawaan, negosiante ken residente iti Barangay Poblacion Norte, Santiago, Ilocos Sur, dagiti suspek a nainaganan a Kim Fuentes y Sam, 32, bakla, awanan asawa, dance instructor, ken residente iti Brgy. Pinyahan, Quezon City, ken ni Koms Datukan y Sangen, 30, naasawaan, drayber iti gateaway vehicle, ken residente iti Barangay Lagundi, San Fernando, Pampanga.

Segun ken ni Carreon, idi agarup 6:00 ti malem, simrek ni Fuentes iti Cycle Vision Enterprises a pagtagilakuanna ket gimmatang iti BSI Protector nga agbalor iti P135.00.

Nabukel a sangaribu a pisos ti impasupli ni Fuentes ken ni Carreon.

Idi nadlaw ti negosiante a peke ti kuarta, dagus a nagtaray a rimmuar ti bakla sa limmugan iti maris-dapo a Ford Lynx a nakaparking iti dayaen a paset ti pagtagilakuan.

Rimmuar iti tienda ni Carreon sana rinetrato ti lugan a nagturong iti abagatan a direksion.

Nagpatulong ni Carreon iti Candon police station ket dagus a napatulodan iti flash alarm dagiti kaduada nga agpatpatrolia iti asideg ti nakapasamakan ti insidente.

Nakita da PO2 Eden Gasmen ken PO1 Rommel Garces ti agliblibas a lugan ket pinakaammuanda ti police station.

Dagus a nangiwayat dagiti polis iti checkpoint iti Barangay San Antonio a ninamnamada a lumsotan dagiti suspek a nagtungpal iti pannakatiliw dagitoy.

Naipan dagiti suspek, agraman iti luganda, iti police station para iti dokumentasion ken umisu a disposision.

Naammuan ti Tawid News a sabali pay a babai a negosiante ti napan iti police station ket binigbigna dagiti suspek a nangbiktima met kenkuana.#