SAN ESTEBAN, Ilocos Sur – Nabagbagsol ken natakawan ti maysa a bakla sadiay Barangay Apatot idi rabii ti Hunio 16.
Kinuna ni Police Senior Inspector Nilo Racoma, hepe ti polis ditoy, a maysa a managan Erick Guillermo, 36, residente iti Barangay Nalvo, Sta. Maria, Ilocos Sur ti biktima a nakita a maysan a bangkay iti Rodan’s Resort a masarakan iti nadakamat a barangay.
Nainaganan dagiti suspek a da Kenneth Paguia, 18, taga-Sibul, San Miguel, Bulacan ngem agnaed iti Apatot, San Esteban ken maysa menor de edad a nailinged iti nagan a Makoy, 16, ken taga-Santo Domingo, Nueva Ecija.
Segun iti report, nagsagrap ti biktima iti bagsol iti nadumaduma a paset ti bagina babaen ti ice peak ken kutsilio ken mapukpukaw ti petakana, selpon, ken ti motorsiklona.
Intudo dagiti di pay nainaganan a saksi dagiti suspek iti nasao a pammapatay.
Agdama a birbiroken dagiti polis dagiti suspek a mapapati a naglemmeng kalpasan ti krimen.#