Bakla, natiliw iti akto a panagtakawna

STA. CATALINA, Ilocos Sur – Naipilaan iti kaso ti maysa a bakla a nasukalan a nagtakaw iti pagtaengan ti maysa a negosiante a babai idi sardam ti Oktubre 27.

Kaso a robbery ti naidatag iti provincial prosecutor’s office maikontra ken ni Joselito Castillo y Bustamante, 44, awanan asawa, bakla, beautician, ken residente iti Barangay Cabaroan, ditoy nga ili  kalpasan a nasukalan a tinakawna ti kuarta ni Natividad Pascua y Real, 50, naasawaan, vegetable dealer, ken residente met laeng iti nadakamat a barangay.

Kas maibatay iti police blotter, kagapgapu ni Pascua  iti comfort room idi agarup alas 7:20 ti sardam ti nadakamat a petsa idi nakitana ti suspek a rimmuar manipud iti master’s bedroom a mangisaksakibot iti dua a bundle ti kuarta nga agdagup amin iti P12,500.00.

Ginammatan ni Pascua ti kuarta sa nagpaarayat kadagiti kaarrubada a nagtungpal iti pannakatiliw ti suspek.

Iti panagimbestiga dagiti polis, simrek ti suspek iti balay babaen ti ikakalay-atna iti interlink nga alad.#