Bakla, pinang-or ti balo

BANTAY, Ilocos Sur – Angaw ti ramut ti panangpang-or ti maysa a balo iti kinainomna a bakla sadiay Barangay Boquig, ditoy nga ili idi malem ti Agosto 29.

Naitaray ni Mark Anthony Lao y Gadingan, 32, bakla, ken residente iti Zone 3, ditoy nga ili, iti ospital tapno maagasan idinto a naipaima ti suspek a ni Maximo Ramos y Unciano, 54, balo, ken kalugaran met laeng ti biktima, kadagiti nagresponde a polis.

Naammuan iti inisial nga inbestigasion a bayat ti drinking spree ti grupo a pakaibilangan ti suspek ken ti biktima, nagsinnuron dagiti dua a nagtungpal iti nabara nga argumentoda.

Mapapati a sinulek ti suspek ti biktima sa naggawid.

Sinurot ti biktima ti suspek ket narurod ti naud-udi, nangala iti kayo sana pinang-or ti ulo ti bakla.#