Bakla, tinakawan ti kinadeytda a lallaki

BANTAY, Ilocos Sur – Suspetsa ti bakla a biktima ti panagtakaw sadiay Barangay Balaleng, ditoy nga ili idi agarup 2:55 ti bigat ti Marso 4 a kumplot dagiti kaduanadagiti kinadeytda a lallaki a maysa kadagitoy ti nangitaray iti bagna a naglaon iti kuartana.

Iti pannakaisurat daytoy, naammuan ken ni Bantay Chief of Police a naipatuloden ti nasao a kaso iti provincial prosecutor’s office para iti ebaluasion daytoy ket karaman dagiti dua a bakla a nainaganan John Paul Pimienta y Viloria, 21, awanan asawa, residente iti Barangay Cabaroan, Magsingal, Ilocos Sur ken Ammiel Abellon y Locson, 25, awanan asawa, residente iti Barangay Capangpangan, Vigan City, kadagiti suspek agraman kadagiti tallo pay a John Does.

Nagpulong iti polis ni Jeffrey Sumalbag y Tabbuac, 24, awanan asawa, bakla, ken residente iti Barangay Lagatit, Sto. Domingo, Ilocos Sur, nga intaray ti kinadeytda a lallaki ti bagna a naglaon iti kuarta.

Iti interbiona iti media a naipatangatang iti DWRS, kinuna ni Bantay Chief of Police Andrew Rabang a suspetsa ni Sumalbag a kakumplot dagiti kakaduana a bakla dagiti kinadeytda ta ammo dagitoy nga adda dakkel a kantidad a kuyogna iti dayta a rabii.

Kinuna ti hepe a suspetsa ni Sumalbag nga adda conspiracy iti napasamak a panagtakaw ket adda partisipasion dagiti dua a bakla a kaduana.

Kinuna pay ni Rabang a kinuna ni Sumalbag a desidido a mangidarum kadagiti padana a bakla ken dagiti tallo a di pay nabigbig a lallaki a kinadeytda.

Segun iti panagimbestiga dagiti polis, bayat ti kaadda dagiti tallo a bakla iti Plaza Salcedo, nakaam-ammoda dagiti tallo a di pay nabigbig a lallaki.

Mapapati nga inimbitaran dagiti suspek ida a mapanda agdeyt iti pampantok ti Barangay Balaeng, Bantay, Ilocos Sur.

Mapapati a nangarkila dagiti lallaki iti traysikel sada nagpaitulod iti nadakamat a lugar.

Kinuna ni Sumalbag a bayat ti panagpatpatangda iti kadeytna, immasideg iti yanda ti kadeyt ni Pamienta sana inarmaran iti imuko ken ginammatan ti shoulder bagna a naglaon iti sumurok kumurang P9,000.00, selpon, ken ATM card.

Kalpasan ti pannakaireport ti nasao nga insidente, nagturong dagiti polis iti nasao a lugar ngem saandan a nasapulan pay dagiti suspek.#