Balasang a sumangsango iti panagtakaw, tiniliw dagiti polis

STO. DOMINGO, Ilocos Sur – Inaresto ti nagtipon a bunggoy dagiti polis ti La Union ken Ilocos Sur ti maysa a babai a sumangsango iti kaso a panagtakaw idi malem ti Hunio 2 iti Barangay Nagbettedan ditoy nga ili.

Inaresto dagiti elemento ti Criminal Investigation and Detection Courts (CIDT)  nga indauluan ni PCI Arbel Merculio ken ti Ilocos Sur Provincial Public Safety Company nga indauluan ni PI Jurex Urbano ken ti Sto. Domingo Police Station ni Rhea Quitevis y Herrera, 27, balasang, ken residente iti Barangay Nagbettedan, Sto. Domingo, Ilocos Sur, babaen ti bileg ti warrant of arrest nga inyisio ni Judge Anjanette de Leon Ortile, ti TRC, NCJR, Branch 156, Marikina City.

Inakusaran ni Emdem Encarnacion, residente iti No. 26 Soliven 3 St., Grand Villas, Quezon City ni  Quitevis ken ni Mary Grace Fernandez, agpada nga agpapaay a katulongda manipud 2001 agingga iti Nobiembre 2010 a nagtakaw iti kuarta ken assorted a napapateg a banag iti balayda sada napan naglemmeng iti Ilocos Sur.

Mapapati nga aglemlemmeng ni Fernandez iti Barangay Gabur, Sta. Cruz, Ilocos Sur.

Nipan ti akusado iti ISCIDT para iti dokumentasion sa naiyawat iti maseknan a korte.#