Balasang, naiyagus iti baybay, natay

CAOAYAN, Ilocos Sur – Dead on arrival iti ospital a nakaitarayanna ti maysa a balasang a mapapati a ginuyod ti agus bayat ti panagdigosna iti baybay sadiay Barangay Manangat ditoy nga ili idi bigat ti Agosto 17.

Awanen ti biag ni Olivia Abijero y Arce, 39, ken residente iti nadakamat a lugar, idi maidanon iti ospital.

Naammuan iti report nga idi agarup 7:30 ti bigat ti nadakamat a petsa, agmaymaysa ni Abijero a napan nagdigos iti baybay.

Nakita laengen dagiti mangngalap a tumtumpaw ti biktima iti kabaybayan ket nupay naitaray a dagus iti ospital kalpasan ti pannakaalawna, indeklara ti doktor a nangtaming kenkuana a dead on arrival.

Mapapati a ginuyod ti napigsa nga agus ti biktima bayat ti panagdigosna a puon ti nakalmesanna.#