Balasang, pinaltogan ti miembro ti fire brigade

MAGSINGAL, Ilocos Sur – Trianggulo ni ayat ti kitkitaen dagiti inbestigador a ramut ti nangpaltogan ti maysa a miembro ti fire brigade iti maysa a balasang iti uneg ti pagpapaayan daytoy nga opisina sadiay Barangay San Vicente idi Mayo 3.

Namin-adu a daras a pinaltogan ni Gerald Resuello y Sabado, 33, baro, miembro iti Fire Brigade ti Magsingal Fire Station ken residente iti Barangay Namalpalan, Magsingal, Ilocos Sur, ni Rainalyn Viorje y Ujano, balasang, ken residente iti Barangay San Basilio iti mismo nga uneg ti opisina ti Sugponan SISA ket nupay naitaray ti biktima iti Magsingal District Hospital, pimmusay daytoy bayat ti pannakataming dagiti sugatna.

Natiruan met iti naiwawa a bala ti pispis ni Divina Von y Viloria, 58, naasawaan, dianitor iti nasao nga establisimiento ken residente iti Brgy. San Vicente ket immuna a naitaray iti nasao nga ospital sa naiyalis iti Gabriela Silang General Hospital, Tamag, Vigan City para iti ad-adda pay a pannakataming ti sugatna.

Segun iti report, bayat ti kaadda ni Viorje iti uneg ti opisinada, immuneg ni Resuello ket nagpatangda iti apagbiit iti biktima.

Mapapati a kellaat lattan a pinaltogan ni Resuello ti balasang iti naminpito a daras a nakatiruan ti nadumaduma a paset ti bagi daytoy.

Nadatngan dagiti nagresponde a polis ti suspek a mapapati a nakaiggem pay la iti paltogna a cal. 45 pistol Colt Mark IV, addaan iti magasin nga awanen ti kargana.

Narekobre met dagiti inbestigador dagiti pito a kapsula manipud iti nasao a paltog ken maysa a deformed slug.

Naipa-mediko nga eksaminasion ti suspek iti Magsingal District Hospital sa naipan iti Ilocos Sur PPO Crime Laboratory Office tapno mapakatan iti paraffin test.

Adda metten iti kustodia ti polis ti paltog a naaramat.

Iti kaudian a report, naipilan ti kaso a murder and frustrated homicide maikontra ken ni Resuello iti opisina ti provincial prosecutor, Vigan City, Ilocos Sur.

Agtalinaed ti suspek iti kustodia ti Magsingal Police Station kabayatan a di pay naipaulog ti commitment order manipud iti hues nga akinhurisdiksion iti nasao a kaso.

Saan a nailanad iti blotter no adda relasion ti suspek ken ti biktima ken no asino ti sabali pay a tao a mapapati a nainbolbar iti love triangle a nagtungpal iti pammaltog.#