Footer

Balasitang, ginandat nga italaw ti kidnap gang

STA. MARIA, Ilocos Sur – Naalarma dagiti nagannak kalpasan ti flash report manipud ti kapolisan mainaig iti panagpanggep ti maysa a mapapati a kidnap gang a mangitalaw iti maysa a balasitang nga agindeg iti maysa a barangay ditoy itay nabiit.

Kinuna ti maysa a nagannak a dina kayat ti painaganan a gapu iti amakda a mabiktima ti anakda iti kidnap gang, itulnog ken sukonennan daytoy iti pagadalan a pagbasbasaanna.

Sabali pay a nagannak ti nagkuna a dinan palubosan  ti anakna nga agwaywayas a mapan agbasa ken imbilinna a kumuyog daytoy kadagiti kaklaseanna wenno kalugaranna no agawid manipud iti pagadalan.

Kanaig daytoy, nagpaayab iti miting ni Police Senior Inspector Eric Fernandez, hepe ti polis ditoy, a nangawisanna kadagiti kapitan ti barangay ken dagiti tanod para iti naing-inget a panagsiputda iti barangayda kadagiti maisar-ong a ganggannaet a rupa a mabalin nga addaan iti dakes a panggep.

Iti pannakiuman ti media kenkuana, indagadag pay ni Fernandez ti panagbalin dagiti nagannak a bigilante ken ti saan a panagwarangwarang dagiti ubbing iti dalan tapno saan a maulit ti mapapati a panagpanggep a mangkidnap iti maysa a balasitang.

Segun ken ni Fernandez, iti agarup alas 4 ti malem ti Disiembre 10, ginandat a kidnapen ti uppat a lalaki ken maysa a babai ti maysa a balasitang nga agbasbasa iti Ag-agrao High School bayat nga adda daytoy iti dalanna nga agawid.

Mapapati a sinardengan ti van a dark green, awanan iti plate number ti balasitang ket dimsaag ti uppat a lalaki sada inkorner ti estudiante.

Saan nga intuloy dagiti lallaki ti gandatda idi naglaaw ti maysa a nakainom a lalaki.

Addan immuna a kaso ti mapapati a panagkidnap iti maysa a balasitang iti Barangay Silag ditoy met laeng nga ili.

Manipud pay idi Disiembre 5 a mapukpukaw ti maysa a 13-ti-tawenna a balasitang.

Kinuna ni Florentina Molina, guardian ti balasitang, a saannan a nakita pay daytoy manipud pimmanaw a napan nagbasa iti dayta a malem.

“Awan pay ti naalami a witness wenno ebidensia no asino ti akin-aramid iti panagpukaw daytoy nga ubing,” kinuna ni Fernandez.

Ngem iti pannakipatpatang ni Jun Ramos ti DWRS iti guardian ti balasitang a naipatangatang iti programa daytoy, nadakamat daytoy nga adda agindeg iti Cabaroan, kaparangetda a barangay, a mapapati a napagsaludsodan dagiti lallaki a naglugan iti maysa a van iti direksion a turongenda.

Segun pay ken ni Molina, naibaga ti taga-Cabaroan a napardas a limmabas a nagpalaud ti nasao a van iti agarup ala una iti malem a pannakapukaw ti balasitang.

Kinuna ni Fernandez a kitkitaenda no adda koneksion ti panagpukaw ti balasitang iti Silag iti pannakagandat a maitalaw ti sabali pay a balasitang iti Ag-agrao.#