Balasitang, mapukpukaw

STO. DOMINGO, Ilocos Sur – Maysa a balasitang ti inreport dagiti nagannak kenkuana iti polis a mapukpukaw sipud pay idi Mayo 1.

Inreport iti polis ni Normina Datumanong y Nining, 44, naasawaan, businesswoman, natibo iti Lanao Del Sur, Marawi City ngem agkaskasera ditoy nga ili, a pimmanaw ti anakda a ni Normila, 13, iti balayda idi malem ti Mayo 1 ket saan pay a naggawid.

Kas panangiladawan ti ina, kalalaingan ti pammagi ni Normila, fair complexion, 4’9” iti katayagna ken pagat-abaga ti buokna.

Mapapati a naungtan ti menor de edad gapu ta nakset ti insaangna nga innapuy isu a nagpunto ken pimmanaw.#