Footer

Balasitang, nalmes bayat panagdigosda iti baybay

STO. DOMINGO, Ilocos Sur –  Nalmes ti maysa nga estudiante bayat ti panagdidigosda nga aggagayyem iti Puerto Beach, Barangay Calay-ab ditoy nga ili idi malem ti Hulio 13.

Awanen ti biag ni Beverly Abat y Tabbal, 14, 4th year high school student iti Lussoc National High School, ken residente iti Barangay Lao-ingen idi maidanon iti Tolentino Clinic and Hospital a nangitarayan kenkuana dagiti  immarayat a lumugar.

Segun iti report, napan nagdidigos da Abat ken dagiti kakaduana a da Saida Valencia y Tacsiat, 15, balasitang, 4th year student; Romwil Bautista y Tabbuan, 17, 1st year college iti UNP, Vigan City, agpada a  residente iti Brgy. Lao-ingen; ken Glen Tabbuan y Ustani, 17, out of school youth ken residente iti Brgy. Calautit, Sto Domingo, Ilocos Sur, iti kabaybayan a sakup ti Barangay Calay-ab ket mapapati a ginuyod ti napigsa a dalluyon ti biktima nga impataaw.

Nasurok a 30 minutos a nagsawar dagiti immarayat a residente sakbay a naalawda ti bagi ti biktima.#