Balay a masuspetsa pakailaklakuan droga, nasukisok

VIGAN CITY – Sinukisok dagiti polis ti maysa a balay iti Barangay Salindeg ditoy idi agsapa ti Enero 17 ket nakasamsamda kadagiti sachet a mapapati a naglaon iti napagango a bulong ti marihuana.

Sinukisok dagiti nagtipon nga elemento ti PAIDSOTG nga indauluan ni PCI Sosimo Raquepo racho, PInsp. Beverly Galsi Magastino, WCPD officer ken polis Vigan nga indauluan ni PInsp. Glenn Meriales Dulay babaen ti direkta a superbision ni PCI Ernesto Pardo Navarro, Jr. ti balay ni Larry Ragunton y Habab, 29, baro, ken aglawlaw daytoy ket nakakumpiskada iti dua a transparent plastic sachets a mapapati a naglaon iti napagango a bulong ti marihuana nga agdagsen iti sumurok kumurang 4.73 grams, 79 a sachet a mapapati a maus-usar iti panagimpake iti illegal a droga, ken 2 a lighter.

Naisubmite dagiti nakumpiska nga ebidensia iti crime laboratory iti Ilocos Norte para iti pannakaeksamenda idinto a naikustodia ti suspek iti Vigan City PNP para iti umisu a disposision.#