Balay dagiti suspek iti indiscriminate firing, nasukisok

NARVACAN, Ilocos Sur -Dandani makalawas kalpasan ti pannakaiposte iti Facebook ti indiscriminate a panagpaputok dagiti walo a lallaki kas panangsaraboda iti baro a tawen, nangisayangkat ti kapolisan iti search operations iti balay ti dua kadagiti suspek.

Ngem negatibo ti resulta ti panagsukisok.

Idi agarup 1:30 ti malem ti Enero 6, sinukisok dagiti nagtitipon nga elemento manipud iti provincial headquarters, ISPPO nga indauluan ni Acting Provincial Director, Police Senior Supt. Nestor Felix, CIDT-Ilocos Sur nga indauluan ni PCI Modesto Carrera, Regional Intelligence Division nga indauluan ni Senior Inspector Dennis Nadullo Ballitok, Provincial Intelligence Branch nga indauluan ni Supt. Edwin G. Balles, Regional Public Safety Battalion (RPSB) nga indauluan ni Inspector Peter Paul Sison ken polis-Narvacan ti balay ni Cesar Funtanilla y Lutchina ken ni Geronimo Gomez y Gapusan, agpada a residente iti Barangay San Antonio, Narvacan babaen ti bileg ti search warrant nga inyisio ni Judge Marita B. Balloguing ti Regional Trial Court Branch 20, Vigan City.

Nagbalin a nabara a tungtongan iti social media kalpasan a naiposte iti Facebook ti video ken retrato dagiti nagisayangkat iti indiscriminate firing manipud iti high-powered firearms kas panangsaraboda iti baro a tawen.

Naiposte pay ti ladawan ti maysa kadagiti suspek a mangipakpakita iti sangatabo a kapsula a mapapati a nagtaud manipud kadagiti paltog nga impaputokda.

Dagus a naikkat dagiti naiposte a video ken retrato ngem adda dagiti naka-upload kadagitoy ket naibinglayda kadagiti agus-usar iti internet agingga iti nagbalin a viral iti social media.

Naipilaanen iti kaso nga alarm and scandal iti babaen ti Criminal Case No. 5340 da Cezar L. Funtanilla, Mark R-Jay Cabana, Jumar Cabreros, Ian Cristopher Calixterio, Russel Funtanilla, Philip Andrew Funtanilla, Geronimo Gomez and Mark Cachola, residente amin iti Barangay San Antonio, Narvacan.

Ngem kinuna ni Felix a saan nga agpatingga ti iwayatda nga aksion mainaig iti nasao nga aksion kas pammilin ti gobernador.

Iti interbiona iti media, kinuna ni Gov. Ryan Singson nga uray ania ti kampania ti gobierno probinsial a saan a panagpaputok iti baro a tawen, adda dagiti ‘iresponsible ken pangas’ a tattao ket imposteda pay iti Facebook ti inaramidda.

Kinuna ni Singson nga iti baet ti ar-aramiden ti gobierno probinsial a panangpapintas iti probinsia, dinadael ti nasao nga insidente ti indiscriminate firing ti imahe ti Ilocos Sur.

Kinuna pay ni Felix nga ad-adu pay a police operations ti iwayatda ket no adda maduktalan a nagliway nga opisial a polis ket kasapulan a maikkatda iti puesto, aramidenna dayta.#