Balay, dimmapo gapu iti posporo

CERVANTES, Ilocos Sur – Posporo nga inay-ayam ti ubing ti nakaigapu iti pannakauram ti maysa a balay sadiay Barangay Aluling itay nabiit.

Segun iti report, idi agarup alas 2:00 ti malem ti Septiembre 18, nakaawat dagiti polis iti text message manipud iti maysa a di nagpabigbig a residente a maur-uram ti balay ti maysa a Jane Apola y Tip-ac, 34, ken agindeg iti nadakamat a barangay.

Iti panagimbestiga dagiti polis, naammuan nga inay-ayam ti tallo ti tawenna nga anak ni Apola ti posporo nga immuna a simgiaban ti family bed sa nagwaras ti apuy iti sibubukel a balay.

Nupay kasta, awan ti naireport a nadunor iti uram.

Mapattapatta a P400,000.00 ti balor ti balay a nauram.#