Balay ken lote (Umuna a paset)

“Life is a shipwreck but we must not forget to sing in the lifeboats.” – Voltaire

AGINNEM a bulankon ditoy Jeddah idi madarimusmosak a nagbawbaw met gayamen ti iliwko iti nobiak a ni Katrina sipud pay daydi tinakawmi a kanito iti ingkam’ panagpinnakada iti nagpatnag a pannaturogmi iti otel nga adda iti abay ti eropuerto maysa nga aldaw sakbay ti luasko.

Kuna man dagiti lallakay nga at-atteng kano daydiay iti sulisog tapno saan nga agbirok datao iti sabali nga umok a pagitlogan ti derrep, aglalo no dumteng ti kabulanan a sumken ket kunam lan’ agpagunggan ti rikna nga agdakiwas no sinti pagpalitnawan.

Addaak iti kasta a kasasad idi iyaplag ni Kadeo, maysa kadagiti kadaraan a tripulante idiay bodega a part-time kubrador iti lotto ti atiddog a folder a pagtayaan kadagiti numero.

Taya ka na, sir Lito, baka mapapasaiyo ang katakam-takam na house and lot, insungona ti folder a naiparabawen iti lamisaanko.  Nagparang dagiti napudaw a ngipenna.

Lotto ti awagmi iti jueteng ditoy daga dagiti Arabo.  Dua met la a numero ti tayaam ngem resulta ti lotto idiay pagilian dagiti elepante, ti maudi a tallo a numero ti pagibasaran iti mangabak.  Kas pangarigan koma no ti rimmuar a lotto number idiay a pagilian ket 1234567, ti nangabak a jueteng number ditoy ket 567.

Maysa ti lotto kadagiti saan a naikkat a bisio ken pagpalpaliwaan dagiti kadaraan iti yumayda panangged iti ballasiw-taaw.  Numan pay maidasig iti babai a naka-abaya, ti aruaten dagiti babai a maabbongan amin a paset ti bagi karamanen dagiti mata, iti likud ti nabengbeng a kurtina, adda latta met dagiti maiparit kas iti arak, babai ken sugal ditoy pagilian a nakaipatakderan ti nasantuan a siudad dagiti kamusliman.

Iti panangiyaplag ni Kadeo iti sanguanak ti maysa nga atiddog a folder a nakaisuratan dagiti numero manipud 000 agingga iti 100, napikapik ti gagarko ken riknak a tumaya.  Ngimmato dagiti kidayko iti panagsabat dagiti matami ken ni Kadeo ta nalawag a nakasurat ti premio agraman no mano ti pagtaya: HOUSE AND LOT – SR100.

Pito gasut a pisos ti pakaisukatan ti sangagasut a Saudi Riyals, ngem para iti maysa a kayatna a pagbalinen nga ebaporada ti kondensadana, awan aniaman daytoy a kantidad, baro man nga awan paw-itanna wenno padre de pamilia nga adda nga agur-uray dagiti ngiwat a suportaranna.

Kadagiti napalabas a bulbulan, nagsasaruno a naibaskag iti sanguanak dagiti nadumaduma a premio nga abaken.  Adda cassette tape recorder ken ti balor ti pagtaya, 20 riyals; relo a nangina ti balorna, 30; singsing a sukog sapatos-kabalio nga agdagsen iti 20 a gramo, 30.  Adda metten namindua a gundaway a segunda mano a kotse ti premio, sag-singkuenta riyals ti pagtaya.  Ngem iti daytoy nga aldaw ket sangagasut a riyals.  Ita man pay, nakunak.

Gapu ta damok a makita daytoy, inarasaasak ni Kadeo no ania dayta a balay ken lote a  premio.  Inyasideg met ni Kadeo dagiti bibigna iti lapayagko ket nabatad ti nangngegko nga uray la adda nagkulaiseg iti nagbaetan dagiti luppok, aglalo idi intugkitugkikna ti tammudona iti lamisaan nga ayanko.

Pinilik ti numero 169,  dinardaras met ni Kadeo a siniggawat ti pagtayak sana inikkan ti ekis iti nangisit a pentel pen ti ayan ti kahon a nakailanadan ti numero.  Kalpasan iti pangaldaw a maammuanmi ti resulta ti lotto babaen iti telex.

KALKALPASKO a nangaldaw idi sinieniasak ni Bushra, ti Sudanese a drayberko a rummuarkami.  Huebes ita ket awan ti serrekmi inton sumaruno nga aldaw ta Biernes ti pannaka-holiday ditoy Saudi.

Agarup tallupulo a minutos a tarayen ti luganmi ti papananmi a post office ta kolektaenmi dagiti sursurat a naggapu iti nadumaduma a sulit’ lubong, personal ken opisial a komunikasion.

Paset daytoy ti trabahok kas Administration Manager ti Ittahad Movers Inc. maysa a freight forwarding door-to-door a kumpania.  Ngem talaga a trabahok, kas nailanad iti kontrata a pinirmaak, ti mangipatakder iti in-house publicationmi a siak ti editor, mannurat, photographer, reporter ken bale one-man army a makaammo iti aminen.

Madama ti bunongko iti sursurat para kadagiti empleadomi a Filipino, Indonesian, Saudi, American, European, Indian, Sudanese, Eyptian ken dadduma pay a puli idi sikakaranting ni Kadeo a nangipus kaniak.

Lakay, (kasta ti kadawyan nga awagda no Ilokanoka), panalo ang numero mo, ingkissiim nga intagalog daytoy i-Bikol a kaopisinaak. Arig dumanon lapayag dagiti isemna.

Naammuak ken ni Kadeo a no house and lot ti premio, sikreto, kayatna a sawen daydiay laeng nangabak ti pagibagaanda.  Datay kunadan, uray ngata ibalam ti kanion ni Kadeo pulos dinanto ibaga no siasino ti nangabak iti house and lot, kas paset ti naannayas a panagtuloy ti premio nga abaken.  Tapno mapnek la ti riknak, pinalipitak iti sangapulo a riyals.  Iti ragsakna ket immay nakiapir, ket iti panaglinnipak dagiti naukrad a dakulapmi, nasinga ti ulimek iti uneg ti opisinami.

Tallo nga oras pay sakbay ti retirami ngem diakon a maipamaysa ti dumdumogak nga ed-editek nga artikulo.  Imbes a magagaranak, aglalaok ketdin a danag, buteng ken alliaw ti agsisinnublat a sumippayot iti kaunggak.  Ngem diak met maatipa ti panagkulaiseg ti luppok ta nabayag metten daydi naudi a rabiimi ken ni Katrina. Kasla agtutukel metten ti marikriknak.  Diak naaluadan ti pannakaibiat dagiti nagadu a saludsod a di met kayat a sungbatan ni Kadeo itay.

Kasanon no maaktodakami?  Mabalin a mapaawidak no ingkaso a kamuslimanda ti kaduak.

Natalged ngata ti lote ken napintas ngata ti balay a premiok?  Kasano ngata a mailakok ti lote wenno maiyawidko ti balay?

Ket kas pangarigan ta  maaktodakami, kabalinak ngata ti sangagasut a saplit?  Urayak la napakiet ta malagipko daydi sanaang ken apges a nagpasarak iti pannakakugitko iti natadem a labaha a nailandag iti sangat’ bayabas idi sumalpaak iti tawen a sangapulo ket maysa, sakbay nga agkakak ti lilidduokak. Daytanto ket makullayoten?

Yad-adayom apo, naitanamitimko.

(Adda tuloyna)