Balay mapapati a pinadapo ti agmauyong nga anak

GALIMUYOD, Ilocos SurĀ  – Dimmapo ti maysa a pagtaengan iti Barangay Kilang ditoy nga ili idi agarup 9:50 iti rabii ti Enero 21 kalpasan a mapapati a pinuoran ti anak ti akimbalay.

Dimmapo ti balay ni Evangeline Delima, 65, balo, ken residente iti nadakamat a barangay ket masuspetsa a ti agmauyong nga anakna a ni Glomar Delima y Ruiz, 26, balasang, ti nangpuor iti balay, segun iti panangisalaysay ti kaarrubada.

Naammuan iti polis ditoy a pinanawan ni Evangeline ni Glomar nga agmaymaysa iti balayda ta napan iti balay ti masakit nga inauna a kabsatna a babai.

Segun iti maysa a saksi, nakitana ni Glomar a nakatakder iti asideg ti balay bayat ti pannakauram daytoy. Mapattapatta nga agbalor ti dimmapo a balay iti P20,000.00.

Pinadas dagiti kaarruba a depdepen ti apuy ngem napaayda gapu iti kakurang ti danum a pagsibogda.

Naipan ni Glomar iti police station ditoy kas kiddaw ti inana gapu iti amak daytoy a puoranna met ti balay ti kaarrubada.#