Balay, masuspetsa a naigagara a mapuoran

VIGAN CITY – Masuspetsa nga inggagara a pinuoran ti maysa a tattoo artist ti pagkaseraanna a balay sadiay Barangay Pantay Daya ditoy siudad idi rabii ti Disiembre 4.

Inaresto dagiti polis ni Eugene Villanueva y Delpinado, 38, naasawaan, ken residente iti Barangay 8, ngem agkaskasera iti balay dagiti agassawa a Ruben ken Cristina Palaganas kalpasan a limtuad iti panagimbestigada nga inggagara a pinuoran ti biktima dagiti computer sets iti uneg ti ti kuartona idi agarup 10:20 ti rabii ti nadakamat a petsa a nakaigapu iti idadapo ti sibubukel a balay.

Awan dagiti akinkukua idi dimmapo ti balayda.

Segun ken ni Maylene Intino, agkaskasera iti nasao a balay, nangrugi ti uram iti kuarto ti suspek.

Dagus a nagresponde dagiti bumbero ti Vigan City ket nadepdepda ti apuy iti agarup 11:40 ti dayta met la a rabii.

Saan a nailanad iti report no apay nga inggaragara a pinuoran ti suspek dagiti computer sets.

Naikustodia ti suspek para iti dokumentasion ken umisu a disposision.#