Balay nasukisok, droga, ramit-droga, nakumpiska

SANTA, Ilocos Sur – Sinukisok dagiti joint personnel ti PAIDG, 103rd Maritime Police Station a nakabase iti Barangay Mindoro, Vigan City, ken Santa police station, ti balay ti maysa a residente iti Barangay Bucalag, ditoy nga ili idi 9:45 ti bigat ti Oktubre 27 a nakakumpiskaanda iti droga ken ramit-droga.

Nakakumpiska dagiti ope-ratiba iti balay ni Jose Birosel y Dameg, 52, naasawaan, iti tallo a heat sealed plastic sachet nga adda kargana nga straw a nagkarga iti mapapati a shabu, 4 a nakalukat a babassit a plastic sachet para repacking, 7 a naputputed nga straw para repacking, maysa a plastic straw para scooping, maysa nga stick a narolio nga aluminum foil, ken dadduma a paraphernalia.

Inimbentario dagiti nagsukisok dagiti kinumpiskada iti sanguanan ni Birosel, barangay officials ken media representatives.

Naipan dagiti nakumpiska iti police station ditoy para iti dokumentasion idinto a maisagsaganan ti kaso maikontra ken ni Birosel.

Kabayatanna, naipaiman iti opisina ti provincial prosecutor, Vigan City ti kaso a panag-labsing iti RA 9165 ken RA 9516 maikontra ken ni Jimmy Fuggan y Salcedo, 47, naasawaan, karpintero, ken residente iti Barangay Magsaysay, Sinait.

Maipalagip a sinukisok ti nagtipon nga elemento ti ISPAIDSOTG, ISPIB, PDEA ISSET, 73RD MICO ken 81st IB PA babaen ti control ti PDEA RO ti balay ni Fuggan idi agsapa ti Oktubre 23 a nakasamsamanda iti mapapati a droga ken drug paraphernalia ken maysa a granada.#