Balay, nasukisok, droga, ramramit-droga, nakumpiska

STA. MARIA, Ilocos Sur – Sinukisok dagiti nagtitipon a bunggoy dagiti polis ti maysa a pagtaengan iti Poblacion Sur ditoy nga ili idi Septiembre 13 ket nakasamsamda kadagiti mapapati a droga ken drug paraphernalia.

Karaman dagiti nagsukisok dagiti nagtitipon nga elemento ti Ilocos Sur PAIDSOTG, PDEA-ISSET, PIB, ISPPSC, EOD ken Sta. Maria police iti panangidaulo da PCI sosimo R. Racho, PCI Louise Benjie Pintor Tremor, PI Jurex Urbano, PI Heherson Isit, PSI Federico Calibuso ken Agent Raymund A. Tabuyo ken iti direkta a superbision ni Provincial Director Police Senior Supt. Reynante Galeon Partible ken koordinasion ti PDEA Region I nga addaan control number 51 series of 2011 for violation of RA 9165 nga inyisio ni Judge Francisco A. Ante, Jr. ti MTCC, Vigan City a napetsaan Septiembre 10, 2011.

Nakakumpiska dagiti nagsukisok iti balay ni Jaime Sampoleo y Masilang, 40, naasawaan, ken residente iti Poblacion Sur ditoy nga ili kadagiti sumaganad: maysa a heat sealed plastic sachet a mapapati a naglaon iti white crystalline substance nga agdagsen iti sumurok-kumurang 1.1 gramo a mapattapatta nga agpateg iti P12,800, assorted nga awan naggianna a plastic sachet a mapapati a mausar a para repacking, 1 nga improvised tooter, 2 a disposable lighter, 5 a nausar a plastic sachet a mapapati nga addaan iti shabu residue, P1,000 a marked money, ken 1 a bassit a plastic sachet a naglaon iti mapapati a shabu nga agdagsen iti sumurok-kumurang a .01 a nailako bayat ti buy bust operation.

Sinaksian dagiti barangay officials iti panangidaulo ni Barangay Kagawad Felipe Realizo ken maysa a reporter ti DZTP ti naisayangkat a panagsukisok iti balay ni Sampoleo.

Naipan ni Sampoleo agraman dagiti nakumpiska iti balayna iti provincial police office iti Barangay Bulag, Bantay, Ilocos Sur para iti maiyannatup a dokumentasion ken disposision.#