Footer

Balay nasukisok, granada, paltog ken balbala, nakumpiska

TAGUDIN, Ilocos Sur – Positibo ti resulta ti panagsukisok nga insayangkat dagiti nagtitipon nga elemento ti kapolisan iti maysa a balay sadiay Barangay Magsaysay, ditoy nga ili idi agsapa ti Disiembre 1.

Sinukisok dagiti elemento ti CIDG, RSOT 1, RPSB 1, RIO 1 ken ti Tagudin police station ti balay ni Clarito Mina y De Guzman, 35, naasawaan, ken residente iti No. 107, San Regino Street, ti nadakamat a barangay ditoy nga ili idi agarup 6:20 ti bigat ti nadakamat a petsa babaen ti bileg ti Search Warrant No. SCC-2014-225.

Dagiti sumaganad ti nasukainan dagiti polis bayat ti search operation: maysa nga M72 fragmentation grenade; maysa a Cal .45 Armscor nga addaan Serial No. 1426928 nga addaan maysa a magasin a nagkarga iti 7 a bala; maysa a magasin para iti Cal. 45 a nagkarga iti 8 a bala; maysa a nalabaga nga ammunition box a naglaon iti 26 live ammunitions para iti Cal .45; 11 kapsula ti Cal. 45; maysa a kapsula ti Cal .38; maysa nga Airsoft HK416, SN TO40352 nga addaan magasin; ken maysa nga Airsoft nga awanan serial number.

Naipan ni Mina agraman dagiti nakumpiska iti balayna iti CIDG Regional Office para iti umisu a disposision.#